Eth Conselh Generau d’Aran destine 200.000 euros tara metuda en valor de Castèth Leon en Es Bòrdes

Eth Plen deth Conselh Generau d’Aran a aprovat aguest diuendres era modificacion de crèdit, per un impòrt totau de 2.683.700 euros, damb es vòts favorables d’Unitat d’Aran (UA) e era abstencion de Convergéncia Democratica Aranesa (CDA). Entre es principaus inversions aprovades, destaque es 200.000 euros tara execucion deth projècte de metuda en valor de Castèth Leon, en Es Bòrdes, endret en qu’actuauments s’amien a tèrme dejà es trabalhs de netrja des accèssi.. En encastre des infraestructures e era cooperacion municipau, era modificacion includís 1.450.000 euros entà tornar a licitar era darrèra fasa deth projècte deth camin ciclable TRANSGARONA, qu’a demorat desèrta per dusau viatge. Plen deth Conselh Generau d’Aran / @conselharan Atau madeish, s’a aprovat ua partida de 10.000 euros entà aumentar er acòrd entre Conselh e Ajuntament de Naut Aran tara melhora de pistes forestaus, que se place ara en 55.000€ aportadi peth Conselh. Atau madeish, s’a creat ua partida iniciau de 30.000€ entara melhora des vestiaris deth camp de fotbòl de Bossòst, ara demora de conéisher eth còst deth projècte per part der Ajuntament de Bossòst e avalorar atau poder aumentar-la. Era modificacion tanben permeterà reforçar partides destinades ath foncionament des servicis publics, damb recorsi entath minjador e eth transpòrt escolar, era climatizacion des sales de resèrva des musèus, era melhora dera fabrica dera Lan, era conservacion d’edificis e equips informatics, e tanben entà despenes de provediments e servicis diuèrsi.